الخميس، 22 سبتمبر، 2016

أفكار لشنط المدارس وفن Iron on Patches ..

مساء الخير ..
الكل يحب التغيير والتجديد، خصوصا مع الدوامات نتحمس نغير ستايل وطريقة اللبس او الإكسسوارات..
شغلات بسيطة تصنع سعادة وحماس بالنفس ..
ماأدري بس هذي طريقتي دائما في إسعاد نفسي وهالشيء انعكس على وسن أختي ، مو مره تفكيرها يتشابه معي 
بس أحب حماسها لتجهيز نفسها وكل شيء حولها مع بداية كل فصل دراسي 
من صغرها عودتها انها تعيش هالجو وأحاول أهيء كل شيء حولها
مره شيء إيجابي يصنع فرق في صقل الشخصية ..
أنصح كل أم وإخت كبيرة تهتم بأدق التفاصيل لكل من تحب من اخوانها او اولادها 
لان هذا راح ينعكس مستقبلا على كثير خيارات وقرارات وإهتمامات بحياتهم ..
فكرت وسن وجمانة بنت عمتي يشترون شنط بطريقة مختلفة هالمرة ..
حصلوا شيء جاهز بس فكروا يصنعون شنطهم بأنفسهم .. راح تفهمون الفكره الان ...
فن Iron on Patches او الابليك
 فن ذوق وجميل خصوصا لو كنتي فنانة بالخياطة والتطريز وبدأتي مشروع خاص فيك بهالمجال ...
راح استعرض لكم بعض الافكار هنا في حسابي البنترست ممكن تطلعون عليها سواء افكار للشنط اوتزيينها..




اولا ..اختيار الشنط اللي راح تنفذين عليها الباتشز ..
لازم تكون قماش وقوي عشان راح نستخدم الكوي لتثبيت الابليك او الرقع ..
المفضل دائما قماش الجينز..
تم اختيار الشنطة التالية من أمازون سعرها جدا رخيص والحمدلله وفقنا بالإختيار طلعت تجنن والخامة حلوه كانها Pre-Washed بطريقة جميله ..ولونها ازرق فاتح رايق ..
جمانه طلبت وحدة لان وسن عندها جينز من اول وقالت مايحتاج راح تحط الباتشز عالاوله ...
هذا رابط الشنطة اللي حاب يشتري وماعنده وحده من أول ..
 (اضغطوا عالصوره  في حال رغبتوا بالشراء)

وعلى فكر جاء مع هالشنطة ٥ قطع باتشز مطرزة بطريقة حلوه ..

ثانيا .. مرحلة إختيار الباتشز
في اشكال كثير وتعتمد علي ذوقك وستايلك وبعد المرحلة اللي تدرسين فيها .. لان بعض المدارس يمكن ماتسمح بالرسومات او حتى المرحلة العمرية ..
طبع انصح فيها طالبات الجامعة او الثانوي
هنا إختيارات وسن وجمانة (اضغطوا عالصور في حال رغبتوا بالشراء)

       


طبعا كلها جميلة جدا جدا لمن وصلت .. بعضها تأخرت بالشحن فاضطرينا نرسل اللي وصلت ...

مثلا .. هذي  كستمايز
وحده تسوي لك الاسم او العبارة اللي تبين وترسلها خلال ٣-٤ ايام ..
وسن اختارت اسمها بس ماوصلت مع المجموعة الاولى .. لو وصلت راح اصورها واحدث البوست إن شاء الله...
ففكرت بصراحة ليش الموهوبات بالخياطة مايبدأون بزنس من هالنوع وحسب طلبات البنات ..فكره روعه وتحتاج للدراسة للمهتمات بهالمجال .. خصوصا لو توفرت بالعربي ،،،

هنا الشحنة لمن وصلت ..
 هذي الشنطة بكيس مرتب مع الباتشز مغلفة بأكياس صغيرة (انتبهي وانتي تفكين الكيس ممكن بعضها ترمينها بالغلط لانها صغيره جدا)
طبعا المقاس اللي اخترنا للباتشز جدا رائع ومناسب لحجم الشنط وهو ٣*٣ أنش تقريبا ..


هنا أشكال الباتشز اللي وصلت


وهذا شكل الشنطة وهي مغلفة وعليها بعض التعليمات للمحافظة عليها وطريقة الكوي والغسيل




لونها زي ماذكرت رايق ...


 شكلها زي مانتوا ملاحظين كانها مغسولة وقديمة بس بشكل كويس طبعا ..


هنا بدأنا نرتب الاشكال والرسومات عليها بشكل مؤقت عشان نعرف كيف راح نثبتها وهالخطوة مهمه ...
 

قررنا نخلي مسافات عشان لسا في اشكال ماوصلت بعد


مهم جدا تشيكون من الخلف وتشوفون الغراء موجود بالباتشز.. اذا مافيها غراء ماراح تثبت بالكوي ...


طبعا لمن تكوين لك الحرية تستخدمين اي مكواه بخار او عادي البعض يفضل البخار عشان يحرص انها ثبتت بقوة 


هنا بدأت اكوي أول وحده وحاولي تمشين وتضغطين بس لاتتركينه عليها بدون تحريك على نفس الشكل لان ممكن يبقع او يخرب القماش


ومهم بعد عشان تتأكدين تقلبين القماش(اذا قدرتي) من جوا وتبدأين الكوي بالضغط والتحريك...


وبعدين بدأت امشي واضغط على بقية الباتشز ..


وكذا خلصت طلعت رايقة مره ولو كثرت بعد بتطلع تجنن..


ولان كثير مهتمات أعرض مشترياتي..
حبيت استعرض معكم شنطة ثانية وسن أختارتها ..
شفافة وصغيرة وسعرها رخيص  (اضغطوا عالصوره في حال رغبتوا بالشراء)

كانت وسن خايفه ماتكفي بالمره ،لانها كانت تبيها لايام التحضير البسيطة
لكن تفاجأت بانها استوعبت اكثر من ٧ مواد ..
لسا مازينتها وحطت إكسسوارات ...
بس طالع شكلها كيوت ..


شاركوني ذوقكم .. واقتراحاتكم لاي موضوع قادم ..
دمتم منجزين ..

هناك تعليق واحد:

 نورة النزاري
مُدوّنه سعودية مهتمة بالفنون والحرف اليدوية، والفنون الورقية و الرقمية
أعمل كمشرفة قيادة مدرسية في وحدة تطوير المدارس،
لدي طفله أسمها زمرد
Norah Alnezari
 Saudi DIY Blogger | Crafter | Scrapbooker | Graphic Designer
I have a baby girl, her name is Zomorod

Related Posts Plugin for WordPress, Blogger...