الأحد، 6 سبتمبر، 2015

ظرف على شكل جيب + صنع فاصل بعلاقة ..


السلام عليكم..
شاركتكم الخطوات الاولى لصنع الظرف على هذا الفيديو في  حسابي على السنابتشات NezariArt


هنا قوالب مختلفه الاشكال والاحجام أختاروا اللي يناسبكم ..

بهذي الخطوة انتهيت من قص الظرف وتزيين أطرافه بالواشي تيبز لإظهار تفاصيل الظرف بصورة جميلة..


 وهنا بالصورة اللي قبل شفتوا الكرتون الاسود دخلته جوا الظرف كتلبيسة عشان تعطي جمال اكثر .. التفاصيل بالفيديو ..


شكل الظرف مع التلبيسة الداخلية قبل الاغلاق ..


شكل الظرف وهو مفتوح بدون مايتغطى عشان يبرز جمال و الوان محتوياته من اعمال وكروت ومطويات ....


شكل الظرف بعد التخريم من الجهة المعاكسة وشرحت بالفيديو كيف ممكن تسوينه بالجهة الثانيه ورد على استفساراتكم...


شكل الظرف بعد إضافة المحتويات .. طالعة تجنن خصوصا اني أقدر أبرز التقسيمات او الفواصل ..


عملت زينة ولصقت ستيكرات الحلقات على التخريمات تبع الملف.. ( اشتريتها من دايسو محل ابو ريالين ياباني)


قلت أكمل تزيين المنظم بإضافة فواصل مثل إستخدام او إعادة تدوير التاقز تبع المحلات .. كثير أحب أجمعهم ولا أرميهم خصوصا الحلوه منها مثل محلات تايبو...


بدأت بعمل خط ترتر عشان أغطي على اسم الموقع ممكن تضيفون اللي يناسبكم زي ستكرات او واشي ، بس حبيت هالمره اغير وأحط ترتر...


بعدها أضفت ستكرات بارزه لونها اسود وغطيت كلمة تايبو ، وحسيت الشكل مو كامل قلت أضيف بالستامبز كلمة حلوة ومعبرة عن التنظيم وهي "اليوم" وعملتها باللون الاسود عشان تطلع كانها من نفس التاقز ، صراحه تجنن الحركة خصوصا عالورق البني...


وعاد لاني دقيقة ماحبيت اعرض لكم تفاصيل العمل بدون زركشه جماليه اخيره حصلت هالحزام بأغراض قديمة عندي وماكنت أحتاجه قلت اقصه وأستفيد منه، قصيت الجزء اللي فيه التخريمات عشان استفيد من التخريم وادخل العلاقة الحديد او الحلقات المعدنية فيه وبعدين بدأت الف خيوط عليه ...


وهنا أشكال والوان الخيوط بعد مالفيتها عليه طالعة ت ج ن ن ... مره حبيتها اخترت الوان غير.. مو الواني الفرايحيه الدايمه هههه قلت اغير، ولان هذي الالوان تمشي اكثر مع اللون البني او الظرف اللي سويته .. لفيت لون اسود وبعدين ابيض وبني وذهبي عشان يطلع حيوي وجذاب...ولاحظوا التعليقة او الحلقة المعدنية فين حطيتها بمكان او تخريمات الحزام جاهزة ماتعبت نفسي.. ( بالله مو ذكيه ...) فيس مبتسم :)


لاحظوا في نهاية طرف الفاصل حطيت بالخيوط مكان للتعليقات والتاقز، سهلة جدا اثني الخيط وطلعي طرفه لبرا وكملي لف الين تخلصين..


وهذا شكل الفاصل كامل مع الحلقة المعدنية، بعدين غيرتها وحطيت ذهبية عشان تمشي مع البلانر وحلقاته الذهبية ..


هنا شكل التعليقات او التاقز بعد مادخلتها بعلاقة الفاصل نفسه ... سوووو كيووت..


وهذا شكل البلانر كامل بعد ماصورته مع كل الشغل ... ماشاء الله تبارك الله بجد جد فخورة بأني جربت الوان جديده وستايل غير ونجحت ...يعني شوي و بأنهبل عالشكل بالطبيعة أحلى بعد.. كل شوي اروح افتحه واتفرج ماشبعت ..


وهذا شكل الظرف الجيب .. صورة مرتبة وقريبة، اضفت ستكرات بالوسط حسيتها اجمل..


وهذا شكل الصفحة الفاصل المقابلة للظرف عشان تتماشى مع الظرف والوانه وزينت طرف الصفحة بواشي تيبز نفس ستايل الظرف ..


صورة مقربة للتعليقات ...



وكذا أكون خلصت معكم هالتدوينة لكن عندي أخبار حلوه لكم .. لازم يكون لكم نصيب من هالجمال...
اولا.. قررت اعمل فيديو يوتيوب لمشترياتي الجديدة والبلانر الجديد اللي شريتة واتكلم و لاول مرة عبر اليوتيوب عن تجربتي مع المنظمات وراح اخصص فقرة للرد على أستفساراتكم الدائمة حول هالموضوع.. عشان كذا حبيت أعلن لكم الان وعبر حساباتي اني راح أستقبل أسئلتكم هنا وراح أجاوب عليها في فقرة سؤال وجواب في نفس الفيديو ان شاء الله ...
لذلك...
ارجوا طرح أسئلتكم هنا او عبر حسابي بالانستجرام ومشاركتي ارائكم او اللي حابين اتكلم عنه .. لاني راااااح ...
اسوي جيف اواي بنهاية الفيديو لبعض التعليقات اللي شاركت هنا او بحسابي الانستقرام على نفس الصورة .. ماحددت العدد ولا الجوائز نخليها مفاجأة .. لكن بالطبع ماراح احتسب اي تعليقات في غير محلها او خارج عن الموضوع او غير هادفة او مزعجة ...

دمتم منظمين بزركشة...:)

هناك 110 تعليقات:

  1. المنظم جمييييل ماشاء الله تسلم يدينك حمستيني اسوي واحد واجرب اشياء جديدة .. متحمسين للفديو وفكرته الحلوة .. ����

    ردحذف
  2. السلام عليكم
    استاذة نورة
    اولا شكرا على العمل الجميل ^_^
    اعجبني التاق :( مره جميل ...
    اذا ماعليك امر ابي اسالك المنظم السنوي زي اللي بالمحل اللي صورتيه بسناب موجود بالسعوديه :( ؟؟؟

    ردحذف
  3. كعااادتكً نورررتي رااائعه ومنجد خقييت مع الثيم واللون البني والاحلى انك تلبين اسئلتنا راح اسوي مثله واكيد راح اشاركك

    ردحذف
  4. ماشاء الله ابداع اتعب وانا اقولها شيء خورافة شغلك
    يمكن انت اكثر انسانة ان زلتي في الانستقرام استانس
    حبيت اسألك لما استخدمتي المنظم حسيتي انه فادك وساعدتك على تنظيم وقتك؟؟؟

    ردحذف
  5. مرحبا
    صراحة من شفت حسابك و المنظمة و انا اعيش عالمي صرت من اطلع تجذبني الاشياء هذي و صار عندي منظم و الحين اشتغل عليه بس افكارك جدا جميله و مميزه الله يسعدك و احاول اسوي اشياء نفسك و اذا ما وجدت اشياء اقرب لها جمال حسابك و مدونتك جمال

    ردحذف
  6. ماشاء الله تبارك الرحمن ابداع يانورة
    تحمست اجرب قريب إن شاء الله

    ردحذف
  7. ايش البرامج يلي تستخدمها في تصميم التقويم للمنظمة

    ردحذف
  8. انا كنت دايم اسوي ظرف تقريبا بنفس الشكل و احط في مطوياتي بس ما قد جا على بالي اني ازينه بس الحين عجبتني الفكرة و باذن الله راح اطبقها

    ردحذف
  9. جدآ جميله وقمه في الترتيب والتنسيق والذوق الرفيع ماشاء الله تبارك الرحمن

    ردحذف
  10. جمااال اعمالك ماشاءالله لاقوه الا بالله😍😍😍😍

    ردحذف
  11. الجمال يرتبط بإسمك دائماً * نوره*
    انسانه ملهمه وعندك من الابداع مايحفز الكثير ممن حولك أحب اتقانك لأعمالك واتحمس للنهاية المبدعه اللتي تصلين لها في أعمالك أتمنى لك المزيد من النجاح والابداع 💛*

    ردحذف
  12. انا مو مجنني الا شغلك بالبلانر هو الوحيد اللي جاذبني اكثر من اي موضوع ثاني
    حتى احزن لما تتأخري م تنزلي شي عنه او يتعلق فيه
    صرت اتعلم واقتبس اشياء من اعمالك الثانية واحاول اخليها تليق بالمنظم وتمشي معه

    وفقرة الاسئلة مناسبه بس ان شاء الله الجميلات يحطو اسئله معقوله
    سؤالي ( اللي م بغى يطلع ) : بتصميم اوراق واقسام البلانر ايش اساسياته عند تقسيم الورقة واعدادها بالفوتوشوب ؟
    طبعا ليا خبرة بالفوتوشوب بس نستزيد منك
    وتشكري ^_^

    ردحذف
  13. جدا جميل المنظم ويعطج الف الف عافيه الجهد
    ولي عوده عشان اطرح سوالي
    وان شاء الله واتمني هاي المره يكون لي نصيب من القيف اوي
    ومتحمسه وايد للفيديو وانشوف مشترياتج
    ويزاج الله خير
    amnoy.89

    ردحذف
  14. اعمالك جداً جميله ماشاء الله وشغل مرتب
    س/ انتي تنقلين البلانر معك في كل مكان ؟ ومايصير ثقيل مع لإضافات الي تزيدينها عليه ؟

    ردحذف
  15. سلمت الايادي و الله شغل نظيف و مرتب ، جزيتي خير ع كل شي تقدميه 🌹❤

    ردحذف
  16. الله يعطيك العافية يارب
    جدا مبدعة ماشاء الله عليك وافكارك في منتهى الروعة.. ودايما استخدم المنظم بس ما فكرت بتزيينه وبأفكارك المبدعة اللي تسهل على الشخص انه يعملها ويحاول يبدع زيك شي مررة يحمس للصغار والكبار كمان
    فكرة الظرف جدا رائعة ماشاء الله عليك (تحت التطبيق ان شاء الله)
    وانت لنا اكبر هدية الله يسعدك ويوفقك

    ردحذف
  17. ماشاءالله مرررررره جميل ..����انا انسانه خاقه مع ابداع سمو معاليكم وجداً محظوظه اني لقيت حساب مثل حسابك يعطيك العافيه����

    ردحذف
  18. يسعدك الهي يااجمل نورك بدنيا ماشاء الله عنك شغلك وأفكارك ونفسيتك وروحك روعه وبتجنني ..حابه أسالك سوْال ...من متى وانتي داخلة هل المجال الحلو وكم سنه اخذ منك حتى تعمقتي فيه وشو هي الأدوات الأساسيه الي لازم نبدأ فيها خطوة خطوة حتى ندخل بهل الفن الحلو ؟؟ويعطيك الف عافيه ياغاليه ...فاتن زيد

    ردحذف
  19. مرحبا
    انا نسيبة البلوشي
    مدونتك جمال ما شاء الله و ألمنظمه ولا اروع جمال استلهم منها للمنظم مالي
    سوالي هل تدخلي عالمك الخاص اي وقت فترة المدرسة ولا ف الويكند بس ؟؟

    ردحذف
  20. نورة صار لي فترة اتابعك ومعجبه بشغلك .. انا من هواة هالاشغال ومن شفت مكتبتك قررت اغير مكتبتي ��❤️ وفعلا جالسة اغيرها الحين .. والبلانر جالسة اشتغل على واحد الحين للجامعة وان شاء الله يطلع جميل زي حقة ماشا الله جمال وترتيب وتنظيم ويفتح النفس ( شروق صالح )

    ردحذف
  21. ماشاء الله يانورة مبددددعة كالعادة حبيت الظرف والالوان وكل التفاصيل الله يحفظك

    ردحذف
  22. ماشاء الله تبارك الله ..انتي انسانه مبدعه بمعنى الكلمة ...واحلى شي شرح الخطوات بكل سهولة ..وعدم البخل بالمعلومات علينا ..ربي بحفظ لك زووووما

    ردحذف
  23. ماشاء الله تبارك الله ..انتي انسانه مبدعه بمعنى الكلمة ...واحلى شي شرح الخطوات بكل سهولة ..وعدم البخل بالمعلومات علينا ..ربي بحفظ لك زووووما

    ردحذف
  24. اسراء ابراهيم6 سبتمبر، 2015 8:01 م

    آستمتع جدا بشغلك ماشاءالله !
    دمتي مبدعة نورة :)

    ردحذف
  25. انتي انسانة ملهمة


    ماشاء الله 💕🌷

    ردحذف
  26. السلام عليكم
    الحبيبه نوره
    اولا ماشاء الله تبارك الله عليكي وعلى اشغالك
    تانيا اسمحيلي اقدملك شكري وامتناني وان احييكي واقولك اني دائما ادعيلك

    الهمتيني ،، وذكرتيني انو لنفسي عليا حق ،، واني اهملت حبي للكرافتز باشكالها بسبب حجتي اللي خلقتها لنفسي اللي هيا غربتي
    شكرا لانك ساعدتيني القي نظره على المحلات الموجوده حولي زي تايبو وكيككي وغيرهم عبر حسابك
    شكرا لانك ذكرتيني انو مو عشاني في غربه انا احرم نفسي من متعتها بالعكس الفرصه هنا اجمل واكبر

    شكرا يانوره لانك بتسعديني باعمالك وتخليني فخوره وواثقه بأنو يوما ما راح اقدر اصنع شيء من لا شيء

    تقبليني اخت ،، وتلميذه
    اختك: ساره البيجاوي

    ردحذف
  27. ماشاء الله تبارك الله
    ربي يسعدك ويوفقكك على ماقدمتي من شرح وبنفس الوقت بخامات بسيطه
    اذا اجتمعت الخامات مع الفكره والحماس يطلع ابدااااااع
    مشكوووووره

    ردحذف
  28. مرحبا أستاذه نوره .. ربي يسعدك �� يكفينا انك تلهمينا بأعمالك .. انت انسانه مبدعه وبالرغم من عدم اقتناعي بفكرة المنظم إلا أني حبيتها منك .. والورق البني ������رائع ..
    وكلمه حق تقال لك .. انت ملهمه �� ..
    نهاد ..

    ردحذف
  29. ما شاء الله مبدعة
    ايش افضل منظم جربتيه ؟ من اي شركة ؟
    و بالنسبة لك الافضل اليومي او الاسبوعي ؟؟

    مريم عبدالرحمن ..

    ردحذف
  30. بسم الله ماشاء الله ... ابدااع وذووق ودائما افكار متجدده وجميله .. الله يجزاك كل خير ويفتح عليك دروب العلم والمعرفه يارب ...
    يارب يوفقك ويسعدك ويحقق لك كل ماتتمناه نفسك ويخليلك زمرده وتشوفيها عرووسه يارب ....
    اختي حبيت أسألك إذا ممكن ولا عليك أمر تعلميني كيف أضبط المقاس البروسونال حق المنظم حقي لاني منظم بروسونال بس مالي خبره بالفوتوشوب وحاولت بالوورد بس ماعرفت ياليت تقدري تفيديني جزاك الله عنا خير الجزاء وجعله في ميزان أعمالك يارب ... دمتي بحمى الخالق عزوجل ..

    ردحذف
  31. مَ شاء الله ، شغل جميييل وملهم ويفتح النفس 😩💗💗 ، بإذن ربي احاول اطبقه ب الاجازه القادمه 🍃 ، انا احب التنظيم وتدوين اليوميات بس لما اجي ازين تتطاير الافكار 🍃😆 .. شكراً لك و دمتي بسعآدة ابديه 🙏🏻💕

    ردحذف
  32. مره جميل البلانر ، بس حبيت اسالك وين ممكن الاقي مثله عندنا بجدة ودي بواحد مثثله مره ؟؟؟؟

    وكمان فكرة الظرف عجيبه ، الله يقويك ان شاء الله دائما انبهر بابداعاتك موفقه بإذن الله ..

    ردحذف
  33. ماشاءالله مره جميل ومو غريب عليك الابداع

    ردحذف
  34. رجعت لسوال
    عطينا افكار لتنظيم الاواق الي تي مقاسها كبيره
    واذا عندج فكره عن الكتب للتطوير والاشغال والعمال اليدويه
    للكبار والصغار بالانجليزي او العربي
    وسوال اخير عشان الكلندر ما كملتيه وقفتي في رمضان
    راحت اتكملينه ولا خلاص ...ويعطيج الف الف الف عافيه

    ردحذف
  35. مشالله تبارك الله تسلم يدك أبدعتي , عجبني إستغلالك للحزام والتاق وإعادة تدويرها . استمري

    ردحذف
  36. وآخيراً استاذه نوره
    شكراً لجهودك الرائعه.... منجد نفس كلام سارة البيجااوي
    كل اللي حولي صار يعرفك وادلهم عليك حتى اطفالي حبوك وحبو حسابك صارو يختارون ويقولو سوي احب اي شئ يربط بين الطابعة والورق والفوتوشوب احب اجسدها بأعمال يدوية..... يمكن لاحظتي نشاطي البسيط جداً هذا بعد فضل الله منك انتي ولو تشوفي حتى مكتبه ما عندي بس حبدأ خطوة خطوة واحقق كل اهدافي باقرب وقت..... وانتي اكبر هديه من ربي لنا.....

    ردحذف
  37. جميل جداً..وإلى الأمام ..👏👍

    ردحذف
  38. احب اعمالك وتزينك للمنظم😩💖
    كثري تدوينات عن المنظم بلييز😍🙏🏼
    بإنتظار الفيديو💖💖💖

    ردحذف
  39. مبدعه مشاءالله تبارك الله
    والله اول شي ادور عليه اذا فتحت السناب اسمك

    ردحذف
  40. يجنننن اعشق ورق الكرافت ، وحبيت عالم البلانر منكك
    ماشالله عليكيي مبدعه وروحك تجنن����

    ردحذف
  41. ماشاء الله تبارك الله... عمل متقن ..فيه ابداع ..ماتنلامين اذا فتحتيه كل شوي وتفرجتي عليه... يسلم يدينك يارب...

    ردحذف
  42. تجذبني اشغالك واعمالك ماشاء الله ،، بارك الله في ايدٍ صنعت بإتقان ،، كل شخص ربي يحط في موهبه لشي ويبدع فيه ،، Bayan Bwz

    ردحذف
  43. جمال واكثر من رائع حبيت الالوان مره بطله شغل مرتب ومتقن ماشاء الله عليك
    تعجبني لمساتك وافكارك وبتكاراتك المميزه .. ربي يحفظك ..
    حبيبتي نزلي لنا مطويات بناتيه للمرحلة الابتدائيه مره محتاج افكار لبنت اخوي تطللب مني وحس خلصت الافكار عندي كل شوي مسويه لها ������ فهده

    ردحذف
  44. ماشاءالله تبارك الله على ابداعك ولمساتك المميزه 😍👌
    متحمسه ومتابعتك خطوه خطوه وتحمست كثييير اني اشوف لمساتك الاخيره
    وفعلاً لمسات فنانه وملهمه كثييير
    انا حابه اشكرك لانك اضفتي لحياتي (التنظيم)
    فعلا كنت عشوائيه ودايم ودي انظم واشوف افكار بس مااطبق
    للوقت اللي شطحت على حسابك بالانستا
    ودخلت مذونتك مباشرة رحت لجرير واخذت طابعه
    عشان اطبع من مدونتك وشريت شغلات كثير مثل او شبيهه لشغلاتك
    وبدأت معاك اول شي سويته كلاندر اللي ارسلت لك صوره منه على السناب
    وسويت المطويه بأفكارك وسويت لي منظم وبدأت فعلياً بالاستفاده منه
    وصار يومي منظم وحيوي عكس قبل
    اللي بقوله لك ،يمكن انتي جالسه تمارسين هوايتك وتحبين تشوفين تطبيقاتنا عشان تشوفين نتيجة جهدك
    لكن انا بقول لك انك انتي باللي تسوينه هذا قادره تغيرين نظام حياة الكثير وانا وحده منهم
    على اني عاطله لكن استفدت من كل شي سويتيه بالشي اللي يوافق حياتي ويومي وبيتي
    الف شكرر وانا سألتك بالسناب عن اسعار المنظمات بالمحل اللي شريتي منه امس وقلتي متوسطه
    بسألك ممكن القى نفس اشكالهم بالسعوديه؟ اوتقدرين تشحنين لي منه؟
    وجزاك الله خير وبارك الله لك بوقتك وعلمك ،واحبك ياملهمه 😍💗💗

    ردحذف
  45. الله يبارك لك مبدعه كل يوم تسعدينا بابداع جديد

    ردحذف
  46. ماشاءالله يعطيك العاافية ..
    حبييتك وحبيت ابداعك ♥♥
    أحب الناس المعطاءة اللي تعلم وتنشر العلم بدون مقابل ♥
    والحلو انك اتجهتي في مدونتك للفنون مكتفيين من الميك اب والطبخ
    مررا اعجبتني المدونة الوانها وترتيبها وكل شي فيهااا .. ماشاءالله
    من زمااان ابغى اكتبلك رد ف سناب او المدونة بس اتكاسل :d
    نفسي يكون عندي صاحبة مبدعة زيك لاني احب دا المجال ♥
    ترا ما ابالغ بس من جد حبيييتك ♡♡♡
    استمرري وبالتووفييق يا أحلى نووورة ♥♥

    الله يسسعدك يااارب ..(··✿··)

    ردحذف
  47. ماشاءالله تبارك الله
    الله يسعدك استفدت منك كثييييراً 💛💛

    ردحذف
  48. مبدعه ماشاءالله يانورة دائما ملهمة للجمال

    ردحذف
  49. ماشاءالله تبارك الله لاقوة الا بالله ☝️🌸
    ربي يحفظ هاليدين ،،

    حبيت اكثر شيء بهالعمل حركة الحزام كانت جداً ملهمه 👌💘

    واما الباقي من اهتمامك بالتقاصيل الصغيره واختيارلك للاشكال وللالوان لا يُعلى عليه ماشاءالله تبارك الله👏

    بصمتك واسلوبك جداً واضح في كل اعمالك💗🌸


    ربي يحفظگ ولاتنسي التحصين انتِ وزوما 🌸🌸

    (بطتگ الي في سناب 😸👌💘)

    ردحذف
  50. ما شاء الله تبارك الرحمن تسلم الأيادي. ...
    ربنا يبارك لك في وقتك و عملك. ....
    استفدت منك كثير

    ردحذف
  51. اهلين.. لازم سؤال عشان ندخل السحب ؟ 😁

    ردحذف
  52. دمتي جميلة رااااااائعة معطاءة
    دمتي كريمة عظيمة منجزة

    ردحذف
  53. السلام عليكم .. المدونة السعيدة المليئة بالالهام ..
    ماشاء الله اختياراتك بالالوان تدل على ذوق عالي .. حبيت الورق اكثر بسببك

    بالنسبه لموضوع البلانر .. أول شي ايش افضل ماركات ممكن ناخذ منها لاني ودي اعرف خيارات اكثر لتغييرات المستقبل ؟
    أنا السنه 2015 استخدمت kate spade وبرضو للسنة الجايه 2016 طلبت نفس البراند ..

    مع اني جالسه احاول بس مو ملتزمه مره بالبلانر ف لو عندك نصايح تكون بلانر 2016 مليانه اكثر او فعاله اكثر .. ؟

    شكراً ومره متحمسه للموضوع ..

    ردحذف
  54. جوري عبد الخالق7 سبتمبر، 2015 2:42 م

    ماشاءالله تبارك الله ..
    شغلك ججدا ججميل وكل مالو يسير اجمل ����..
    اتمنى انك تفتحي متجر او محل وتبيعي الحاجات الجميلة اللي تسويها ��❤️❤️.

    ردحذف
  55. نورة أيتها الفاتنة بدماثة الأخلاق تحية محملة بالأماني مملؤة بالحب ومعطرة بالياسمين أبعثها إليك وأغلفها بتهنئة من كل قلبي أن كسبتي قلوبنا . كل هذا غيض من فيضك عزيزتي فمهما قدمت أو سطرت أظل عاجزة عن إفائك قدرك حتى أن الحروف تتقافز أمامي من فرحتي بك فهنيئا لنا بك مع أجمل الورود والأمنيات لك بالتوفيق تقبلي مروري في مدونتك المزهرة دائما ولك أطيب المنى
    عهود الحمراني

    ردحذف
  56. مرا حبيتها 😍💜 مبدعة ماشاء الله عليكِ تسلم الايادي المميزة 👏🏼👍🏼 مدونتك ، إنستغرامك حاجه تفتح النفس والهمتيني في حاجات كثيرة ربي يسسسسسعدكِ ، أعطيتيني فكرة لمشروع أعمله قريباً إن شاء الله ، وحاجة ثانية اني اشتريت أجندة ومافيها جيوب كافيه وبفكرتك الجميلة الهمتيني ورأح أطبقها لأجندتي الخاصة 💕 أحبك وأحب أعمالك والألوان الفاتحة الجميلة اللي تفتح النفس 💖💖💖 ربي يسسسعد من رباك ويجعل الجنة دارهم يارب 💜💜💜 سحر ، حسابي في الإنستغرام : sahar91__

    ردحذف
  57. بصرآحة ما ادري وش أقول بس يا بختنا بانسانه مثلك !
    شخص يحب الخير للكل و ينشر الهامه لمجتمعه , و ما ابالغ لو اقول صرت آشيك ع حساباتك بشكل
    شبه يومي ! فنك مختلف و يعطي دفعه قويه لي و للي مثلي .. صرت اترك الرتابه و احب
    احيط نفسي بألوان هادئه و غيرت غرفتي و صار عندي بورد مهام و تحمست ابدأ اقتني منظم و كل هالشي
    لك فيه بصمة مميزة , يمكن كلامي ملخبط أو ما عرفت اصوغه بشكل مثالي بس مجرد حكي من قلبي
    و أتمنى يوصل قلبك بسلاسه لأنك رجعتي لي الايجابيه بحياتي بمرحلة بدأت فيها اغوص في روتيني و اشيائي
    المعتاده , شكراً من القلب و لا تفي ..

    خلود محمد / khulod_1994

    ردحذف
  58. فعلاً : less is more !
    البساطه في اغلب الاحيان خلابه ♥♥ .

    منى عسيري .

    ردحذف
  59. مااااااشااااااااء الله تبارك الله خطيييييير قسم وافكااار جدييدة
    مبروووووووك الانجاز
    وعقبال ما يخلص هالترم على خيير يارب
    أثير عبدالرحمن
    @12crochet

    ردحذف
  60. ما شاء الله على هالابداعات المتميزة

    انا من سنوات سويت منظمه لي بس ماكانت عندي الافكار المميزه نفس اللي عندك وتركت منظمتي بعدها بفتره وما استمريت فيها

    ومن فتره حبيت الفكرة وبحث عن افكار ولقيت حسابك صراحه الهمني وشجعني ارجع لهذا العالم


    يبالي اشحن العده والعتاد من اوراق واكسسوارات هههههههه

    عندي لك كم سؤال :

    بالنسبة لاقسام المنظمه كيف تنظمينها ؟ او كيف ممكن انظم مدونتي ؟

    وسؤال بالنسبة لمدونتك .. عندي مدونه بس اتكاسل اكتب فيها .. شو نصايحك علشان اكتب بمدونتي وكيف تنظمين وقتك للكتابه التدوينات

    ردحذف
  61. ماشاء الله تبارك الله ياجميلة ..
    كعادتك دائما .. ابداع وجمال وتألق كروحك تماما ..
    الكلمات تعجز الوصف حقا حفظك الله ..
    ومن ابداع لاخر ..

    انستقرام : reham_hd

    ردحذف
  62. السلام عليكم ورحمة الله وبركاته
    الله يسعدك اختي نورة ،
    مدونتك وحسابك هنا والسناب شي مُثري ومثير بالمتعة ، فيه كمية جمال ماشاء الله ، اقدر أقول انه يحفّزك لتنظيم اوراقك مع التدوين و المنظم والمطويات والأظرف ، حساب ممتع خاصة للطالبات والامهات والمحلات الاعمال اليدوية والورقية بوجه خاص ، من خلال اطلاعي للحساب لاحظت تواصلك وتجاوبك مع الأخوات انتِ طبقتِ حديث حب لأخيك ماتحب لنفسك الله يجزاك خير و
    حديث : (( أحب الناس إلى الله أنفعهم، وأحب الأعمال إلى الله عز وجل سرور تدخله .... قال : قال رسول الله -صلى الله عليه وسلم- : " خير الناس أنفعهم للناس "، بحسابك هذا ساعدتِ اللي ماتقدر تطلع المكتبة كثير تجيب الأوراق والمطويات الجاهزة التقليدية ، الشغلة قائمة على الذوق وبصمة الشخص شوية ورق واستكرات وكم ملصق تكوّن لنا عمل جبار ، حتى افكارك ممكن تلهمها بشي حتى لو اقتبستها ، الحساب تبارك الرحمن فيه كمية جمال وألوان مبهرة من الأفكار والتصوير وإخراجك للعمل وفّقتِ فيه ، مع احترامي لنا كعرب قلما اجد حساب مهتم بالتدوين والمنظمات ، حتى الحسابات التجارية شيء مكرر مايشجعك تأخذين الا مجبرة ، حسابك للوهلة الاولى كأنه لأجنبية ، مو انتقاص لنا حاشا لله ، لكن معروف عن الأجانب المنظمات والتدوين شي انيق صراحة ، والمشكلة صرنا نعتمد على المستورد اكثر مقارنة بسعرها المبالغ فيه لاتستحق ان ادفع وان دفعت مجبر أخاك لابطل ، لو طبقنا فكرة من افكارك وأضفنا عليها الاستكرات والتيبز والورق راح ابدع واخرج بشي جميل مناسب لي ، يكفي انه من صنع يدي ، أكون فخورة لما احد يسألني من وين اقول انا عملته ممكن كل شوي اناظرها وأقول معقولة ، المنظم اللي عملتيه أشبه بما يكون ببارتي جميل لا قوة الا بالله ، فكرة اعادة تدوير بعض الأشياء اضافة جميلة خاصة الترتر متواجد عندنا بس مافكرت اضيفه ، حسابك مُلهم للي عندها مشروع اعمال يدوية راح يفيدها كثير ، ماقصرتِ الله ييسر امورك بالمواقع والشرح هنا وبالاسك ، اتمنى ماتنقطعي عن التدوين لما ترجعي بالسلامة للسعودية ، اتمنى ما أكون اثقلت عليك بردي الطويل ، Floona_cantik

    ردحذف
  63. السلام عليكم استاذتنا المبدعة

    ماششششاءالله تبارك الرحمن كل اشيائك اللي تعمليها تبببببببببببكي من الجمال ماشششششالله تبارك الرحمن
    والمدونة لحالها راحة نفسية من كثر الابداع اللي فيها ماشششالله تبارك الله ربي يحميك

    وبالنسبة للمنظم ما اقول الا يا حسافة ايامي اللي قضيتها بالجامعة مع دفتري البشع D: :( لو كنت حشوف هالابداع صدقيني ما كان تخرجت 3>

    ولا عليك امر كنت ابيك تعملي فيديوهات لترتيب الغرف و ديكورات الغرف و كذا 3>

    Dalia Assiri
    @Martina_999

    ردحذف
  64. يعطيك العافية وماشاء الله افكارك مبدعة وجميلة صحيح اني ربة بيت بس احب اتابع افكارك ومدونتك تعجبني مرة حبيت فكرة الملف وراح اسوى واحد للفواتير الاجهزة ان شاء الله .

    ردحذف
  65. رائع رائع رائع .اختياراتك للالوان تجيب السعاده دائما وأبدا مبدعه
    استمري يا ملهمه

    ردحذف
  66. كعاادتكك ي نورة ، مبدعةة و ملهمةة
    جد لما لقيتكك ، لقيت ضالتي
    و البلانر رووووعةة تباركك الرحمن
    رح احاول اضبط لي واحد باذن الرحمن

    دمتِ مبددعةة

    ردحذف
  67. ماشاء الله تبارك الرحمن
    انتي انسانة جد مبدعة بافكار بسيطة تطلعين بشي جميل وراقي
    وانا عن نفسي استفدت منك وان شاء الله بطبق

    ردحذف
  68. امل حداداي
    بصراحه ماصرت حتى اشوف التلفزيون وقت فراغي اقضي فيه اعمالي التي اقتبستها من افكارك الرائعه انتي يانوره عملتي شي لوجه الله تعالى نميتي مواهب كل وحده تحب هالشغل بس كانت متوهقه عطيتينا من وقتك وجهدك تستمعين لنا وتردين على استفساراتنا دون كلل ولاملل ولا مكابره حسابك جدا رائع حبيتك وحبيته وحبيت كل مواقعك بالتواصل الاجتماعي وادري كيف اقدم شكري لك لاني احب هالاشياء بس كان وقتي اكثر شي لعملي وعائلتي في نفس الوقت ماكان عندي التنظيم اللي تعلمته منك اتمنى لك التوفيق والوصول الى مبتغاك ويسعدك الله اضعاف اضعاف اضعاف مااسعدتيني ويحفظ لك بنوتتك العسل ...
    وتراني علقت بالانستقرام لان ماكان يضبط معي هنا وهالحين حبيت اجرب هنا مدري بيضبط والا لاء
    ولو ضبط تستاهلين انتي تستاهلين ملايين التعليقات ياقلبي الله يوسع لك من اوسع ابوابه ايتها الملهمه الرائعه ....

    ردحذف
  69. @Sweetfly22 أم نورة12 سبتمبر، 2015 9:27 ص

    عمل رائع ومميز ..مثل ماعودتينا يانورة. .الله يسعدك كثر مااسعدتينا �� بالنسبة لي متابعتك من ثلاث سنوات ..واستفدت منك الكثير ..لي ولبناتي فس ملفات الإنجاز ومطوياتهم ودفاترهم وكذالك أخذت فكرة توزيعات العيد الأضحى الماضي بطباعة الخروف الكيوت ���� وعيد الفطر هذا ب تغليف الملون شفتي كمية السعادة اللي بتنثريها حولنا �� ..أبدعت واسعدت ربي ييخليك يسعدك @sweetfly أم نورة

    ردحذف
  70. حبيت الفكرةة مرررههه، فاصل ابداعي كما عودتينا

    امنيتي المجنونة في الحياةة ان التقي معاج ف غرفة شغلج ونشتغل يوم كامل 😻😻
    امنيتي يكون عندي نفس هالمكتب، بس للاسف صعب نلاقي وقت..

    الله يوفقج

    ردحذف
  71. حمستيني اسوي ظرف لكارد هديه :$ ، دايم انتي فضيعه ماشا الله تبارك الله 💕

    ردحذف
  72. السلام عليكم *-*
    أول شي شكرا كثيييير لفنك و لتحفيزك وإلهامك وكل شي جميل ومفيد تسوينه .. الله ينفعك وينفع فيك
    ثاني شي البلانر كنت أشوفها كذا مرة بس ولا مرة تحمست لها نفس لما تكلمتي عنها *-* رحت أبحث عنها زيادة وعزمت أسوي لي واحد
    وبس الله يسعدك ويوفقك .
    سارة الزهراوي

    ردحذف
  73. ما شاء الله شغلك مرتب ومبدعة . . اتحمست اسوي منظم زي كدة ����

    ردحذف
  74. الله يسعدك ويكتب أجرك ��
    جد التنظيم شي مهممم اول كنت انظم اشغالي ع ورق الملاحظات وبعده سرت اطبع من مطبوعات متجر قرطاسيه والان ع مطبوعاتك
    وكل ماكان المنظم مرتب وجميل اتحمس اني انجز أكثر سواء من اشغال البيت او الدراسة ..
    ولو تعرفي فين ممكن أحصل نفس المنظم الغلاف في مكة أكون شاكرة لك جداً ...

    ردحذف
  75. فكرة الجيب جداا بططلة �� والجميل انك ماثبتيه بطريقة اعتيادية .. يسسعدك نورة مدونتك كمية جمال وسعادة

    ردحذف
  76. جزاك الله خير نورة ❤️❤️
    اشتهيت اسوي منظم :( بس اعرفني ادوّن واتحمس يومين وبعدين اتركه 😩

    ردحذف
  77. ماشاء الله علبك!!
    من يوم وأنا تابعتك وقعت في عالم ثاني
    أمس سويت مطوية على شكل كتاب إن شاء الله اليوم أزينها وأحطها في الانستقرام
    الظرف عجبتني فكرته بسويه وأحطه في الملف عشان المطويات بس بأسويه بشكل ثاني بحيث يكون مقفل ومايتقطع إن شاء الله إذا سويته بأنزله في الانستقرام كمان
    المنظمات سويتلي منظم السنة اللي فاتت وضاع مدري وين راح بس حسيت ما أكتب فيلو يعني أعمالي قليلة مو كثيرة
    رائعة أستمري...

    ردحذف
  78. ابداع لاحدود له .. عمل جميل جدا أحب أفكارك و استخدامك لخامات بطرق جميلة وبسيطة و ظهور أعمال فخمة وجميلة من خامات بسيطة ...صراحةً من بديت اتابع مدوناتك و انستغرامك عطيتيني طاقة تفائلية كبيرة و عطيتيني فرصة لتعرف على فنون جديدة ما كنت اعرفها ..
    استمري يا ملهمتي

    ردحذف
  79. السلام عليكم
    هذي اول مره باعلق انا متابعتكِ من زمان لكن بصمت :$
    أنتِ انسانه جداً مبدعه وافكارك جد تحمس الواحد يسوي نا شويه اقوم اسوي لي منظم مع انه عندي واحد لكن مختلف عن المنظم الاعتيادي يعني انا سويته بنفسي ")
    كنت دايما اشوف تطبيق البنات واتحمس ونفسي اسوي لكن دايماً انشغل بالدراسه لكن ذي المره باذن الله اقدر اقسم وقتي
    جد الله يسعدك انتِ تقريبا الوحيده الي بتحفزني اشتغل وابدع دائماً لما اسوي فكرة جديدة بيقولون ليا اني فاضيه ومن هذا الكلام سلبي :(
    لكن باكمل ولايهمني شيء ")

    ردحذف
  80. أزال المؤلف هذا التعليق.

    ردحذف
  81. السلام عليكم
    اولاً: جزاك الله على ماتقدمينه من افكار وتنظيمات وجعله في ميزان حسناتك
    ثانياً: حابه اعرف اسم منظمك السلك اللي يفتح كيف يكتب بالانقلش لان نفسي اطلبه من برا
    شاكره لك

    ردحذف
  82. مبدعة دائما .. وجاري التطبيق ربي يسعدك

    ردحذف
  83. ما شاء الله عليكي مبدعة بمعنى الكلمة ^-^
    يا ريت انو عندي منظم عشان اسوي زيك بإذن الله باشتري اذا قدرت !
    جزاك الله عنا خير الجزاء

    ردحذف
  84. كلمة جمممميلة قليلة والله
    جد قمة بالابداع والذوق
    واتمنى اكون مثلج وبحاول ان شاءالله اجرب اسوي اشياء جميلة واوريج
    ربي يعطيج ألف عافية على المدونة الجميلة ويجزاج ربي بالجنة

    ردحذف
  85. صراحة ابداااع
    ماشاء الله بس ممكن سؤال ؟
    متوفر محلات تبيع بلانرز بالسعودية ؟
    وان شاء الله اطبقها اذا جاني وقت ❤️

    ردحذف
  86. ماشاءالله عليكي يانورة مبدعه فنانه تعرفي تتفنني حسابك زي ماقتلك نآدر الوجود كعربي تجدبني طريقتك فالتزين والاشياء هادي حتا المنظم كنت دايم أحوس فيه لمن اطبع او الاشياء وترا في مطويتين سويتها منك وان شاءالله اوريكي هيا مرره حسابك صار عشق هوا والمودنه .. بس بسالك التحميل مازبط معايا يتحمل بس مايفتح :( الستيكر تحمل بس الورق ماتحملت

    ردحذف
  87. مع أني شفت الموضوع من قبل إلا أني دخلت مرة ثانية أشوف الجمال هذا :">
    وكل ما أدخل تنفتح نفسيتي للتنظيم، وأتعب وأني أقول جمال جمال *0*
    لازم أجلس يوم وأشتغل على منظمي الخاص *في يومٍ ما إن شاء الله*
    دايمًا أدخل مدونتك، أمتِع ناظري بالألوان والأعمال اللطيفة وأتحفز أسوي أشياء جديدة ❤️
    نورة أنتِ إنسانة مبدعة ومتميزة بأفكارك وأتشرف بمعرفتك ومتابعتك بكل مكان :")
    أحب الناس اللي يحبون يشاركون ويفيدون غيرهم بكل محبة ونقاء قلب 3>
    جزاش الله خيرًا على كل ما تفعلينه من أجلنا نحن مُحبي الأعمال الفنية واليدوية ^()^

    ردحذف
  88. وااااهه مشاءءالله جميل ابدعتي .📔👏🏾👏🏾👏🏾💜

    ردحذف
  89. من زمان بتابعك ع الأنستقرام وكثثير حبيت فكره المنظم الأسبوعي حبيت الفكره كثييير ....
    راح أجرب أعمل المنظم أن شاء الله ...

    ردحذف
  90. يارب يكون لي نصيب من الجيفت اوي

    ودائما انتي مبدعه يا نوره الله يوفقج ويرزقج كل ما تتمنينه

    ردحذف
  91. الله مرا الالوان جميله مع بعض والتنسيق بينهم حلو وابدعتي 😍😍ي نوره الله يعطيك العافيه ان شاء الله الترم الجاي 😴راح اسوي لي منظمه من بدايت الترم الحين اكتفيت يس اني طبعتها وحطيتها كأنها أوراق ع الجدار😅. أتمنى تفيديني فين اقدر احصل ع كذا منظمات وأماكن الشراء او ان شاء الله يكون لي نصيب بوحده 👀🙌🏻❤️

    ردحذف
  92. يعطيك العافيه على جهودك ماشاء الله
    فعلا التدوين شيء مهم جدا والحمد لله متعوده عليه من أيام النوته العاديه
    بس دحين في البلانير صار شكلها مجذب أكثر ويصير أتحمس أكتب فيها
    أممم أكثر مشكله أنقهر منها في نفسي أني مو ملتزمه في تنزيل على الأنستقرام يعين يكون عندي مواضيع حلوه أصور أعمالي لكن ماأنزلها أمكن كسل أو تأجيل؟! أمكن بحكم دراستي الجامعيه في تخصص طبي مع أنه مو عذر ><!
    وفي الوقت الحالي في الأجازه أنزل بوست وكدا لكن أول ما ترجع الدراسه أختفي ..

    لو عندك حل أو طريقه أقدر ألتزم بيها
    ويعطيك العافيه يارب❤️❤️❤️

    ردحذف
  93. السلام عليكم
    انا اتابعك من زمان وهذا اول تعليق ليه على مدونتك .. صراحه ماشاء الله شي جميل
    ياعسل انا دوبني شريت بلانر kikki k مثل تبعك بس اخذت مقاس مديم ورقه صغير جدا 17*9 لما ابغى اطبع صفحات جديده مقدر اطبعها وجهين لانها تجي محروله وجه يمين والثاني يسار عشانها صغيره ماني عارفه كيف اتصرف معاها ياليت تفيديني الله يسعدك
    كمان انا حبيت البلانر منك فصرت حابه تنزلين تدوينات اكثر عن تزين البلانر وحتى في السناب نزلي كيف تزيني بلانر تبعك كل بعد فتره
    ومشكوووووووووره انك تشاركينا افكارك

    ردحذف
  94. ان شاء الله قريبا راح اجهز لي شي وارسل لك صورةة انجازي .. انت ملهمة للافكار .. تحمسين الشخص يعمل وينتج .. تساعدين بلا مقابل غير عن اشخاص كثيرين .. الله يعطيك ع كبر نيتك يا رب

    ردحذف
  95. انا انقطعت فترة عن السناب والانستا .. حبيت اسالك هذا الدفتر جاهز شريتيته ؟؟؟ اللي فيه حلقات معدنية ذهبية ؟؟ لو انتي صممتيه ؟؟
    وبس اضفتي فيه التزيين والظرف ؟؟

    ما شاء الله .. يعطيك العافية

    ردحذف
  96. ما شاء الله إبداع
    تابعت الخطوات بالسناب و النتائج الرهيبة بالانستقرام و جميع الخطوات بالتفصيل في المدونة
    الله يسعدك
    بجد مبدعة و حبيت الألوان و الإضاءة و التصوير
    شكرا لك و لجهدك المتواصل

    ردحذف
  97. انتي انسانه ملهمه 💕💞💞 ربي يسعدك يعجبني انكمخلصة فيةعملك مع اانو بدون مقابل ك

    ردحذف
  98. يازييينك ويازين شغللك احبك
    بجد ذوق وترتيب تفتحي النفس للشغل
    الله يسعدك جاري التنفيذذ😚.........

    ردحذف
  99. فكرره جميييله 💓 .. و تدويناتك كلها جميله و تفتح النفس 😍❤️.. انتِ من الأشخاص او من البلوقر الي ما امل من كثر ما اعيد اقرا التدوينات كل مره .. >> ان شاء الله اكون بلوقر جميله نفسك 👌🏻💜💜 .. اعجبتني جداا سلسلة المنظم و ان شاء الله بطبق الأفكارر قريب .. نحبك نورره استمرري 👌🏻😍💕💕

    ردحذف
  100. فكرة جميلةة راح اسويها شكرا الله يسعدك بس سوال كيف سويتها على اي مقاس ورق؟🌸💜

    ردحذف
  101. قريبا اجسد تطبيقاتي لنماذجك بحول الله وقوته

    ردحذف
  102. جممممميل جممميل بشكل لا يوصف
    أحب تفكيرج المبدع ونضرتج
    الله يحفظج يارب
    أنا ما صار لي وقت طويل اتابعج بس دايما اطبع مطبوعاتج
    والمنظم قريب راح اشتريه بإذن الله واسوي معاه هالشغلات الخرافية
    أحب هالنوع من الاهتمامات

    ردحذف
  103. انتي آدمية تجيبي السعادة .. و شغلك يجيب السعادة .. دايما احاول اربط اي حاجة تسويها بهوايتي المفضلة (الكروشيه ) .. الله يسعدك ^_^

    ردحذف
  104. ماشاء الله تبارك الله
    الله يزيدك من فضله يا نورة

    أعتبرك من الشخصيات الملهمة الله يحفظك يارب

    ردحذف
  105. بسألك تسوين تقويم حائطي حجم اي ثري ؟

    ردحذف
  106. منظمك مرة جميل والله يوفقك يارب ويزيدك الهام وقوة وسعادة وحبيت اسالك عن افضل انواع الضمغ من خلال تجاربك وبعد ابي اسالك عن الوقت وكيف تقدرين تنظيمين يومك بين مشاريعك ودرستك وبيتك ماشاء الله

    ردحذف
  107. تفضلين لوحة المهام او تدوين مهامك في المنظم فقط ؟

    خلود محمد ..

    ردحذف
  108. صراحه اتعب اتعب وانا اقول شي موقع جمييييييييل بحد ذاته ، صراحه هذا شي من زمان وانا ابغاه خصوصا اني من محبين الأعمال اليدوية والتزين والأشياء الجميله، بس بغيت اسألك انتي نزلتي مقال عن مخطط الإجازة وحطيتي عدة اقسام بس نزلتي ثلاث اقسام، خططي،وديني،ومطبخي، وياليت تنزلين باقي الأقسام لان جد جد مره مره مره عجبني

    ردحذف

 نورة النزاري
مُدوّنه سعودية مهتمة بالفنون والحرف اليدوية، والفنون الورقية و الرقمية
أعمل كمشرفة قيادة مدرسية في وحدة تطوير المدارس،
لدي طفله أسمها زمرد
Norah Alnezari
 Saudi DIY Blogger | Crafter | Scrapbooker | Graphic Designer
I have a baby girl, her name is Zomorod

Related Posts Plugin for WordPress, Blogger...