الخميس، 1 يناير، 2015

مطبوعات شهر يناير ٢٠١٥



يسعدني ان اشارك معكم محتويات منظمي لعام ٢٠١٥ مجانا للإستخدام الشخصي وليس التجاري..

اولا: قررت ان اصمم محتويات منظمي الشخصي حسب إحتياجاتي الشخصية و اريحيتي بالتنظيم وتوزيع مهامي..
لمن وصلني منظمي من موقع Kikki.K عجبني شكله المنظم الخارجي اكثر من محتويات المنظم اللي جات معه مجانا..
بعضكم سألني ليش ماعجبني و كان ودكم تشوفون محتوياته، راح اعرض لكم صور توضح شكل كل محتوياته من الموقع نفسه:


اولا: هذه واجهة المنظم وهي عبارة عن صفحة المعلومات الشخصية ومعها ستكرات للفواصل
ثانيا: قسم المظم وهو عبارة عن منظم اسبوعي فارغ بدون تواريخ ماعجبني طريقة تصميمه حسيتها مملة والخانات ضيقة ومافيها توزيعات تناسب مهامي يعني بين قوسين تقليدي جدا، هذي صورته:

ثالثا: قسم To Do حلو هذا ماراح اغيره ممكن اعمل شيء بتصميم ثاني كنوع من التغيير..
رابعا: قسم ملاحظات الاجتماع .. هذي بعد كويسه باخليها لقسم المحاضرات الجامعية 
ثانيا: حاولت ابحث وحصلت كذا منظم جميل بس برضو حسيتهم تقليدية مثل:
  • Filofax شيكوا عليها هنا بالرابط يمكن تعجبكم؟
  • اكثر وحده عجبتني طريقة منظم Erin Condren بس ماحبيتها لانها بسلك زي الدفتر.. شيكوا موقعها هنا يمكن تعجبكم ؟
  • وحصلت كثير من مواقع مو مشهوره يعني مصصمات بالنت يبيعون تصميماتهم ممكن تبحثون عنها في Etsy على هذا الرابط ماحبيت اشتري لان الشغله مو مستاهله كلها جداول وصممتها في وقت قصير وبالعربي وبتواريخنا.. ممكن بعضكم مايقدر يصمم ممكن يشتري جاهز ويريح نفسه ..لكم الخيار...


وبما أني بدأت التدوين هالسنة بجدية وزي ماذكرت سابقا صممت مجموعة مطبوعات خاصة لمنظمي، ولا ابي فيها اي مصلحة غير اني استفيد فعلا منها واخلي غيري يستفيد ويتشجع ويصمم ويكون منظمه على مزاجه الشخصي.


اولا: بدأت بتصميم تقويم شهري منفصل لكل شهر ميلادي يوافق الشهر الهجري على شكل فواصل تناسب مقاس A5 و A4 مع خانة اسفل التقويم لكتابة عبارات إلهامية (يفضل طباعتها على ورق مقوى ابيض)



 ثانيا: صممت بطاقات تقويم شهري مقاس صغير و وسط كشكل مختلف مع خانة اسفل التقويم لكتابة عبارات إلهامية
يمكن إستخدامها في الجيب او لوحة المهام (يفضل طباعتها على ورق مقوى ابيض)
ثالثا: المنظم وهو منظم اسبوعي لشهر يناير ٢٠١٥ واخترت تصميمه بهذه الطريقة لتوزيع المهام وتقسيم مهام اليوم الى صباح، خلال اليوم، مساء الى جانب قسم ملاحظات لكل يوم.
عجبتني هالتقسيمه لاني حسيتها الاقرب لتقسيم مهامي خلال اليوم .
كما يوجد تقويم شهر يناير ٢٠١٥ وخانه للمهام الاسبوعية.



طريقة الطباعة لمقاس A5: تطبعين مقاس A5 على ورقة A4 العادية من الجهتين ، يعني تطبعين اول مره على الجهة الامامية من ورقة A4 وبعدين تقلبينها للجهة الثانية وتطبعين نفس الصفحه مره ثانية .. يعني كذا راح يصير عندك اسبوعين في ورقه وحده فقط، اذن نحتاج ورقه ثانية ويصير عندك منظم اسبوعي كامل لشهر يناير..وبعدين تقصينها من المنتصف وبعدها التخريم واستمتعي بالتدوين لهذا الشهر.


طريقة الطباعة لمقاس A4: تطبعين مقاس A4 على ورقة A4 العادية من الجهتين ، يعني تطبعين اول مره على الجهة الامامية من ورقة A4 وبعدين تقلبينها للجهة الثانية وتطبعين نفس الصفحه مره ثانية .. يعني كذا راح يصير عندك اسبوعين في ورقه وحده فقط، اذن نحتاج ورقه ثانية ويصير عندك منظم اسبوعي كامل لشهر يناير ..ضعيها داخل ورق شفاف او تخريمها واضافتها لملفك الجامعي او اي منظم بهذا المقاس واستمتعي بالتدوين لهذا الشهر.

اخيرا: صممت غلاف ووضعته عباره عليه ممكن نغيرها كل فتره..
لتحميل جميع الملفات الخاصة بمطبوعات شهر يناير ٢٠١٥ تفضلوا الرابط هنا...

لاتنسوني من دعواتكم وتعليقاتكم الجميلة..
دمتم منجزين ..
وإنتظروا مطبوعات شهر فبراير القادم ..


هناك 20 تعليقًا:

  1. يزاج الله خير..
    ممكن اسم البرنامج المستخدم في عمل التقويم؟؟

    ردحذف
  2. شكرا فكيتي لي ازمه لي اسبوع ادور كالندر جميل وملهم جزاك الله كل الخير بس اذا فيه امكانية لك عادي نزلين تقويم السنه كامله اسهل واسرع لنا ولك :")

    ردحذف
  3. ممتنه لك اشد الامتنان ❤❤ ! جد كنت محتاجه كاليندر يجمع بين الهجري والميلادي وم خطر فبالي انك بتسوين عاد الشغل منك غيير غير ❤��.
    بس تمنيت يكون سنه كامله عشان ننسقهم ونطبعهم مره وحده ، جد لو سويتي السنه كامله بتكونين ساعدتينا بشكل ❤؟ الله يسعدك يارب

    ردحذف
    الردود
    1. ايه وانا بعد كان ودي بس مافكرت بالفكره الا متأخر، بإذن الله راح احاول انزل كم شهر مع بعض

      حذف
  4. الله يعطيكي العافية .. دائما تحمسيني لاعمالك .. اتمنى اقابلك و اشكرك على مجهودك الرائع

    ردحذف
    الردود
    1. يعافيك يارب وعتبري شكرك وصل ياقمر ..

      حذف
  5. الله يجزاااك خيييير :"(
    من جد ما تتصورين قد ايش بخاطري تقويم عربي وانقلش ويكون شكله جميل ..يعني بالانقلش الاقي بس عربي اشكالهم مرة تقليدية وتجيب الهم الوانه..
    وفكرة البلانر من زمااان فبالي بس مشكلتي مدري ايش اكتب فيه ..اشتريت صغير للجامعه كل يوم اكتب فيه الواجبات والبحوث الي عندي وفيه جدولي .. بس مو الي بخاطري ..صاير فاضي .. اذا شفت الي باليوتوب كيف يصلحون حقاتهم بالستكرات وغيره اتمنى اسوي مثلهم بس ماحصل ..
    عاد الحين رجعتيني لحماسي وبشتري ان شاء الله بلانر بحجم الي عندك .. بس اذا تعرفين اماكن تبيعهم غير النت ياليت تخبرينا ♥♥
    معليش كثرت كلام ^^"

    ردحذف
    الردود
    1. ياحلوك.. كويس حمستك واسعدتك بنفس الوقت.. بإذن الله لو شفت شي خلال فترة وجودي بالسعوديه راح اعطيكم خبر

      حذف
  6. مشكوورة والله يجزاك خير ..
    دايماً تعجبني أفكارك وتصاميمك ..

    ردحذف
  7. يالاسلاااام جدا جمييييل
    لكن لاحظت ان الكاليندر شهر جينوري فقط ، هل هناك بقية ؟

    ردحذف
  8. السلام عليكم ورحمة الله
    ممكن اسالك فين القى الدفتر اللي انتي حاطة في منظمتك ..؟

    ردحذف
  9. جدا جدا مستمتعه بأعمالك و احب اتابعك واتعلم منك انتي مبدعه ربي يسلم يديك
    ويعطيك الصحه والعافيه

    سؤالي : كيف اخرم الاوراق وانا ماعندي خرامه بسته فتحات ؟

    ردحذف
  10. جزيتي خيرا رائعماتقدمين

    ردحذف

 نورة النزاري
مُدوّنه سعودية مهتمة بالفنون والحرف اليدوية، والفنون الورقية و الرقمية
أعمل كمشرفة قيادة مدرسية في وحدة تطوير المدارس،
لدي طفله أسمها زمرد
Norah Alnezari
 Saudi DIY Blogger | Crafter | Scrapbooker | Graphic Designer
I have a baby girl, her name is Zomorod

Related Posts Plugin for WordPress, Blogger...