الثلاثاء، 9 ديسمبر، 2014

مطوية بـ ٨ أوجهة من الورق الشفاف ..


هذا نموذج المطوية اللي راح أشتغل عليها من كتاب الصف الثالث متوسط، الفصل الرابع..
مره سهلة طريقة عملها، ماتحتاج فيديو أعتقد.. بعد شوي راح تبان معكم وانا اشتغل عليها..
طبعا الافضل تجربون عمل المطوية على ورقة خارجية قبل البدء بعملها على الورق المخصص..

✂️

الورق المستخدم في هذه المطوية هو الورق الشفاف..
يمكن لاحظتوا في أغلب أعمالي حبي لاستغلال هذا الورق، هو بالعادة يستخدم في صنع الكروت وكإضافة بسيطه لاعمال التزيين..
بس من اشتريته وانا احاول أستخدمة في افكار أخرى، راجعوا الصور هنا
#NZDIYPartyDecorations
والمدونه وشوفوا افكاري في إستغلاله..
الورق الشفاف أسمه Vellum اللي حاب يشتريه من أمازون، تحصلون رابط الشراء في قسم “منتجات أنصح بها” هنا
وايضا هنا رابط الشراء مباشر


في بنات اذكر ارسلوا لي تطبيقاتهم على دروسي واشتروا هالورق من المكتبات بالسعودية، هو نفسه الورق المستخدم بالمدرسة تبع الاعمال الفنية والرياضيات بس حاولوا تاخذون الورق السميك مو الخفيف..


 الادوات اللي نحتاجها:-الاوراق المطبوعة من النت ( هنا موضوع متكامل عن كيفية الحصول عليها)
-ورق شفاف “حبيب القلب واللي دائم يميز أعمالي” 
-لصق جهتين
-ادوات زينة (اختياري)


وانا أشتغل عالمطوية امس وقاعده اطويها طلع معي هالشكل العفوي وصورته وحبيت أشارككم الصوره لاني أحسكم تشبهون هالقلب..
شفاف، ابيض، نقي …


لايفووتكم بس المزااج قهوة مع افضل ويفر تشوكلت في العالم بالنسبه لي..
هذا المزاج تبع أمس..
المهم الحين طويت المطوية حسب الشكل الموضح بالكتاب المدرسي ولاحظوا كيف شفافة وانيقه وناعمه ..

المطوية هذي تتميز بان لها ٨ اوجه او ٨ خانات للكتابة والتدوين..
في كل جهه من الجهات زي مانتوا شايفين بالصوره مستطيل ..
كل شكل مستطيل تدون فيه الطالبه درس، لان الوحده فيها ٨ دروس..
اذن كيف تكتب الطالبه وتدون الدرس والورق شفاف..!!
خطرت ببالي فكررره خطيييره و ج م ي ل ة …


شايفين الورقة الزرقاء اللي بالوسط..؟

هذي احد المستطيلات الثمانية اللي بالمطوية، أخذت مقاساتها من المطوية نفسها..
هذي الورقة نموذج للقص وراح أستخدمها كبطاقات للتدوين داخل المطوية ..


شايفين نموذج البطاقة الزرقاء اللي بالصورة السابقة قصيت عليها بنفس المقاس الاوراق الملونه المزخرفة الجميله..
اللي طبعتها بالبيت على ورق مقوى ابيض سادة، شايفين كيف جميله والوانها روعة وطباعتها عالية بالدقة..؟!
تبون تطبعون نفس الورق او غيره و بنفس الجودة والالوان..؟!
يالله تفضلوا الموضوع جاهز هنا.
شاركتكم اهم الاسرار الناجحه والخطوات المهمه في طباعة الاوراق المزخرفة بالمنزل مع اهم الروابط لمواقع تقدم تصاميم مميزه وايضا نماذج الاوراق اللي استخدمتها بهذا الدرس..


الان راح نضيف اللصق ابو جهتين على الكروت الملونه او المزخرفة بهذه الطريقة..
اللي ماعنده هالنوع من اللصق ممكن يستخدم صمغ بس نراعي النظافه والدقة..
يعني نستخدم شيء بسيط ..


الحين بدأت فكرة تزيين المطوية توضح..
طبعا هالفكرة من بنات افكاري اللي تجي قبل النوم وتؤرقني حماسا للتنفيذ …
الحين زي ماذكرت سابقا، المطوية شفافة، ومن اجل استغلال جمال وميزة هالورق جاتني هالفكرة الحالمة والناعمة..
من خلال ابراز جمال الورق المزخرف بطريقة جمالية قمت بوضعه كخلفية لابواب او اقسام المطوية ..
لاحظوا كيف لصقت الورق المزخرف بالورق الشفاف من الجهة الامامية للورق المزخرف..
يعني صار يبان الورق المزخرف بطريقة جميله لواجهة المطويه ومنها نستغلها كبطاقات للكتابة من الداخل..
لحظة تشوفون بقية الصور..


هذا شكلها بعد إكتمال البطاقات من الامام..
لاحظوا البطاقات جايه اصغر من اقسام المطوية يعني خليت لها برواز من الورق الشفاف، لاني ماابي الغي فكرة وجمال الورق الشفاف..
وش رايكم بالفكرة ..؟


وهذا شكلها من الخلف..
٤ اقسام داخلية و ٤ اقسام امامية ..
لحظه راح تبان بالصور فكرتها اكثر ..


وهنا شكلها كامل لمن افتحها مع بعض من الخلف ..
٨ اقسام، ل ٨ دروس ..
شايفين الوان البطاقات كيف طالعه جميله، والورق الشفاف بارز جمالهم ..
انا مغررمه بهالفكرة وصرت ابي ابروز هالمطوية واسحب على اختي..


وبعد هذي الصوره اتوقع وضحت فكرة المطوية..
وهذا شكلها من الداخل، بطاقات بيضاء للكتابة والتدوين داخلها، ممكن ان يسطر الورق بالقلم وتكون جاهزة للكتابه او سادة..
وضروري يكون الورق مقوى، ليضيف سماكة وثقل للورق الشفاف لانه خفيف، وحتى يساعد بالكتابة والتدوين بأريحية..✂️
وكما ذكرت سابقا ٨ اقسام جميلة ممكن ان تنفذ لاي مشروع علمي او مدرسي..


طبعا هذا شكلها قبل الرتوش النهائية..
هذا الكلام كله امس سويتها وخلصتها، وكان في بالي أكمل اليوم التزيين بوضع عناوين للمطوية واسوي لها ظرف..
بس تخيلوا وش صااار..؟!
قمت على بقاياها المشرشره ..✂️✂️
قصصتها زمرد الله يصلحها..
وللاسف ماأحد استفاد منها، عالاقل كويس صورتها حللت تعبي وخسارة الاوراق والطباعة..
اذا شفت منكم تشجيع واعجبتكم ممكن انفذها هالمرة بتصوير فيديو، لاني مضطره اسويها لاختي حرام وهقتها ..
يالله اتمنى بجد اعجبتكم وخرجنا معا بافكارنا خارج الصندوق على قولتهم، وطلعنا بافكار جديدة بعيدا عن الافكار القديمة التقليدية ..
اللي راح ينفذها يرسل لي التطبيق لإضافتها للمدونة ..
مسائكم إبداعات ..


هناك تعليق واحد:

  1. جميل يا نوارة تسلم لي يمناج ... أم لطيفة

    ردحذف

 نورة النزاري
مُدوّنه سعودية مهتمة بالفنون والحرف اليدوية، والفنون الورقية و الرقمية
أعمل كمشرفة قيادة مدرسية في وحدة تطوير المدارس،
لدي طفله أسمها زمرد
Norah Alnezari
 Saudi DIY Blogger | Crafter | Scrapbooker | Graphic Designer
I have a baby girl, her name is Zomorod

Related Posts Plugin for WordPress, Blogger...