السبت، 4 أكتوبر، 2014

٨ نتائج من مطبوعات خاصة لإستقبال الحجاج ..



أبارك لكم ختام العشر، وإستقبال أعظم الأيام عند الله يوم النحر، أسأل الله أن يجعلكم من المقبولين، وأن يجمعني بكم في الفردوس الأعلى وكل عام وانتم بخير..


في هذا العمل صممت ٣ مطبوعات تختص " بهدايا الحجاج"  وقمت بإخراج عدة أفكار تصل الى ٨ إستخدامات لتوزيعات وهدايا لإستقبال حُجاجنا بإذن الله ..الله يتمم لهم حجهم ويبارك لهم يارب ويحفظهم… 

الفكرة جديدة ماقد شفت أحد مسويها، حبيت نفرح اهالينا وأصدقاءنا لمن يرجعون من الحج بلفته بسيطة كرت، هدية، طاولة إستقبال صغيرة ..مو بس هم يجيبون لنا هدايا.. 

طريقة العمل:

اولا وقبل البدء بالعمل نقوم بتحضير المطبوعات وطباعاتها على ورق A4 العادي الابيض او الابيض المقوى.


اولا: طريقة الملصقات:


نقص الملصقات اللي على شكل دوائر، لاحظوا هنا قصيتها بالمقص كنت ودي الكاميو تقصها بس كان الوقت متأخر وقلت بسرعه أخلص، اللي عندهم خرامة دائرية يمكن تجي مقاسها جربوا.. المهم انا ماأحب أقص بشكل دائري مايطلع بالضبط زي ماتبين بس حاولوا ..

طيب الملصقات لها إستخدامااات كثيير يمكن ذكرت لكم بعضها بالعمل الاول هنا حطيتها عالمصاصات والعلب واشياء كثير ..
هنا حاولت بعد أطبقها على علب الموية او العصير وزينتها بالواشي تيبز او اللصق من باب الاضافة ..



وهذي النتيجة



فكرة ثانية: بالملصقات عملت مسكة ممكن تلفين فيها سجادة كهدية أو ممكن علبة الهدايا أو اي شيء تحسين يحتاج لف ..
الطريقة زي ماهو واضح إختاري ورق مقوى مناسب للملصقات مثلا هنا أستخدمت اللي لونها رمادي وحطيت ورق مقوى رمادي وقصيته بهالشكل مستطيل ولصقت عليها الملصق ..


وبعدها لفيتها على القماش


 وهنا النتيجة غيرت اللون ولاحظوا غيرت معه الورق المقوى عشان يصير فيه تناسق ..


ممكن تصغرين اللفة او اذا كان شي صغير أو بشكل إسطواني


وبرضو عملت نفس الفكرة على الزجاجيات تبع التقديم 


فكرة ثالثة للملصقات وهو عمل بوكس، هنا إخترت قالب بوكس على شكل كيس
القالب من هذي المدونة أخذته.. لازم ماننسى الحقوق ..


بعد ماتحملون القالب وتطبعونه، وزي ماذكرت لكم مسبقا بالدروس السابقة بأن القالب نحتفظ فيه عشان نقدر نقص عليه كل مره، يعني مايحتاج تطبعينه كل مره، أول مره قصيه على الورق نفسه حطي الورقه كاملة ولصقي بلصق خفيف عشان تثبتين الورقة والقالب مع بعض ومايتحركون أثناء القص ..


وهنا بدأت القص لاحظواالورق طبقتين، الورقة تبع القالب تحت والورقة حق البوكس نفسه لاتشيلونها الا لمن تنتهون بالمره عشان تبان لكم أماكن الثني ..


هنا لاحظوا باقي العلاقات تبع الكيس هي مربع بالداخل يعني نحتاج تفريغ، نحتاج مشرط عشان نعمل فتحة بسيطه وبعدين نقص بمقص صغير نحيف عشان مانخرب الشكل واحنا نقص..


هنا الشكل بعد القص لحظة لاتشيلون القالب خلوه بمكانه ..


نبدأ الثني بإستخدام أداة الثني ولاحظوا قاعدين نثني على الخطوط اللي بالقالب عشان كذا مهم ماتشيلون القالب الا لمن يبدأ شكل الصندوق يوضح  ..


هنا نبدأ نلف الصندوق على بعض ونلصق ونحاول من تحت نغلقه بهذي الطريقة ..


النتيجة تكون بهالشكل لازم تتأكدين انه تم إغلاقه بشكل كويس، احيانا أحط قطعه مربعة من جوا بأسفل العلبة عشان تعطي دعم للصندوق وماينفتح بسرعة اكيد فهمتوا وش قصدي ..؟


وهذا شكل الصندوق بعد مالصقنا عليه الملصق ممكن تحطون شريطة او مشبك تمسكون أطراف الكيس ..



حطيت فيه حلويات العيد وهذي النتيجة ..


آخر طريقة للملصقات هي إستخدامها بالكروت أو الالبومات أو الصور...
هنا قلت أسوي سكراب بوكنج سرييييع جدا ..


لمن تكونين مستعجله ومافي فكرة هههه الحوسة تحمس ..!!


هنا النتيجة لاتدققون بس مثال ..


تحميل الملفات


ملصقات
ثانيا: الكروت



فيه ٣ مقاسات للكروت كبير، وسط، صغير أختاري اللي يناسب عملك وحجمه، إذا تبون كرت عادي بس تكتبون فيه علطول وتحطونه مع الهديه إستخدموا الكبير زي هنا إستخدمت الكبير ..




وهنا برضو فكره لطيفة أستخدمته مع الكيس البني أول شي حطيت قاعدات دانتيل ورقية وبعدين حطيت الكرت وبعدين ثبتهم بمشبك ..


النتيجة:


تحميل الملفات

كروت
{حجم  كبير}

كروت
{حجم  وسط}

كروت
{حجم  صغير}
ثالثا: التاقز او الفواصل



برضو حطيت لها مقاسين وسط وصغير إختاروا اللي يناسب العمل، مثلا هنا إستخدمتها كتعليقة لبرطمانات التقديم وإستخدمت الحجم الصغير، لاحظوا فيه مسافة فوق لانه لازم نخرم من فوق عشان نحط الشريطة أو الخيط ..


النتيجة:


برضو ممكن نستخدم التاقز الكبير مفاصل للكتب ..


تحميل الملفات

تاقز
{حجم  وسط}

تاقز
{حجم  صغير}
......................................................................................

لتحميل جميع التصاميم بملف واحد {اضغط هنا}

(تنوية: ارجوا عدم إستخدامها لأغراض تجارية .. ارجوا مراسلتي للإستخدام التجاري)

هذي بعض الافكار وأكيد بإبداعاتكم وبإضافاتكم بتكون أجمل، أتمنى عجبكم الموضوع واتمنى تنشرون الموضوع لاصدقائكم عبر شبكاتكم الاجتماعية، تحت ممكن تضغطون على مشاركة  في تويتر وفيسبوك وبنترست ..
وأتمنى اشوف تفاعلكم وتعليقاتكم هنا بالمدونة واتشرف بإستقبال تطبيقاتكم ..
أشكركم كلكم ..
الى موعد مع الابداع ..

هناك تعليق واحد:

  1. ماشا الله.. حبيت التدوينة
    الله ينفع بك ويبارك لك ����

    فخورين فيك!

    ردحذف

 نورة النزاري
مُدوّنه سعودية مهتمة بالفنون والحرف اليدوية، والفنون الورقية و الرقمية
أعمل كمشرفة قيادة مدرسية في وحدة تطوير المدارس،
لدي طفله أسمها زمرد
Norah Alnezari
 Saudi DIY Blogger | Crafter | Scrapbooker | Graphic Designer
I have a baby girl, her name is Zomorod

Related Posts Plugin for WordPress, Blogger...