السبت، 19 يوليو، 2014

مين يبي يسوي هالفيونكات الجميله..؟!



مين يبي يسوي هالفيونكات الجميله..؟! تدرون المجموعة الجاهزه منها غاليه جدا..

نزلت العمل النهائي قبل الطريقة من باب الحماس 
مع أن طريقة عملها سهله ويمكن بعضكم عنده خبره بهالشيء بس قلت أساعد اللي مايعرفون وكمان نحمس اللي مالهم بهالشغلات ..
لان كثير منكم يسألني وش التمبلت أو القالب اللي دايم أتكلم عنه ببعض أعمالي ..! حبيت أوضح هالنقطة أكثر ..

القالب هو شكل جاهز أبحث عنه بالنت وأطبعه وأستخدمه كنموذج للقص عليه.. يعني مثل هالفيونكه بحثت عن قالب على شكلها وطبعته وبدأت القص عليه …✂️
بعضكم بيقول فيه آله جاهزه تقص وتعمل هالاشكال .. أنا كهاويه أحس وجودها مايلزم .. لسببين: أولا اللي بتشتري أي آله تسوي قوالب جاهزه تسأل نفسها، كم مره راح تستخدمها وهل راح تسوين كميات كثير؟! يعني بعضكم يمكن عندها متجر وتحتاج تعمل كميات كبيرة، بهالحالة ممكن تشتريها؟! ثانيا: قرأت بعض الرفيوز عنها وقالوا ماهي دقيقة ببعض المقاسات ..!! 
نرجع لهالعمل : لمن تقصون القوالب حاولوا تحتفظون فيها بدرج القصاصات يعني لاترمونها عشان تستخدمونها أي وقت ثاني ماله داعي تطبعين وتقصين كل مره شيء متعب ..👎
بعد ماقصيت جبت الورق اللي بأستخدمه وهو نفسه اللي نزلته لكم بقسم مطبوعات .. قلبت الورقه ولصقت بلصق شفاف خفيف لتثبيت القالب ويضمن عدم حركته أثناء القص ..✂️
هنا حبيت أوضح طريقة عمل الفيونكة .. كل فيونكة لها قالبين أساسين للقص اللي فوق وهو الفيونكة نفسها واللي تحت هو الشريطة ..🎀
لها طرق كثير للابداع ممكن تقصينهم على ورق من لونين مختلفين بحيث الفيونكه تجي لون واللي تحت الشريطة تجي لون ثاني .. خساره فاتتني ماسويتها😕 مو مشكله بأسويها مره ثانيه 💪
لفي الفيونكة أول ولصقيها بنفس اللصق اللي حكيت لكم عنه قبل مره نظيف ومايبان ، نفس الطريقة اللي بالصورة ..
أخر شي نلصق الفيونكة فوق الشريطة ونلف الشريط اللي بالوسط من الخلف على الفيونكة عشان تمسكها ونلصقها ..
فهمتوا ليش قلت لو أخترت لونين بيطلع أحلى كان الشريط اللي بالوسط بيطلع لون ثاني ويبرز الفيونكة أكثر «كثرت شرح
أكيد كلكم بتسألون وين القالب
أبشروا راح انزله اليوم مع قوالب حلويات العيد ..
القالب هذا فيه أربع فيونكات لأحجام مختلفه زي اللي سويتها بالضبط ..

هناك تعليقان (2):

  1. يعطيك الف الف الف عافية ياعمري

    ردحذف
  2. ممتاز مره سهله وحلوه
    يعطيك العافية

    ردحذف

 نورة النزاري
مُدوّنه سعودية مهتمة بالفنون والحرف اليدوية، والفنون الورقية و الرقمية
أعمل كمشرفة قيادة مدرسية في وحدة تطوير المدارس،
لدي طفله أسمها زمرد
Norah Alnezari
 Saudi DIY Blogger | Crafter | Scrapbooker | Graphic Designer
I have a baby girl, her name is Zomorod

Related Posts Plugin for WordPress, Blogger...