الاثنين، 21 يوليو، 2014

أداواتي.. ومن فين أشتريها ..



تعبت وتعبتكم معي بخصوص الأداوات ومن فين أشتريها ..
وقررت أعطيكم لستة بالمواقع المتخصصة بهذي الشغلات مع أني ضد هالفكرة لأسباب كما ذكرت سابقا:
أولا: وأهم سبب لم يسبق لي شراء أداوات متخصصة بأعمالي الفنية من أي موقع إلكتروني وذلك لتوفرها هنا بدولة نيوزيلاندا.
ثانيا: ماأبي أظلم أحد في التركيز على موقع بينما هناك مواقع أخرى أفضل و يمكن أرخص ويمكن فيها إختياراتك وتوجهك الخاص.
لكن مع ذلك راح أذكر لكم بعض المواقع لتزيدكم معرفة وتوسع مدارككم في هذا الفن وتتعرفون على أسماء الأداوات وتغوصون في هذا العالم الجميل
كل هالمواقع ماهي إلا من واقع بحثي العميق وتصفحي وقراءة بعض الرفيوز عنها ولكم الإختيار..


بس أتمنى قبل ذكر المواقع تسوون هالاشياء :
-ماأحد يعتمدها كمواقع نهائية ومافي غيرها ..
-أبيكم قبل ماتدخلون هالمواقع تفتحون هالصفحة من مدونتي بالتمبلر عاللاب توب عشان تطلع لكم الروابط
-تمخمخون على كل موقع بحيث تتصفحينه كويس وتدرسينه دراسه
-تسوين سلة شراء مبدئية وأحسبي قيمة سلتك مع تكلفة الشحن مع العلم ان غالبيتها تشحن فقط داخل أمريكا يعني تحتاجين عنوان في أمريكا
-أذا كان عندك مواقع غير اللي بأذكرها وجربتي الشراء منها ياليت تشاركينا فيها لان الكل يبي يستفيد من تجارب حقيقية.

راح أقسمها لمجموعات حسب المجالات الفنية ..

أولا : مواقع شاملة لبيع جميع المستلزمات الفنية من كرافت ، سكراب بوكنق ، خياطة ،كروشيه، كويلتنج ،خرز ومستلزمات الاكسسوارات ،أقمشة ، أداوات منزل، ديكور ، أعمال فنية للاطفال :

AMAZON.COM
في المقدمة وبدون أي منازع حسب ماقرأت رفيوز من كبار المصممات بعالم الكرافت أو الاعمال الفنية عموما بانهم يعتمدون الشراء من أمازون لتنوع الاداوات الفنية من موزعين مختلفين للشركات الأم وايضا وجود بعض العروض والخصومات المذهله خصوصا على الاداوات مثل الاجهزة والخرامات والات القص ..

CREATE FOR LESS
موقع مخصص لاعمال الكرافت عموما وعندهم عروض جميله مثلا راح يساعد أخواتي اللي عندهم متاجر ويشترون بكميات، أذا شريتي بالحبه بتكون بسعرها الاصلي. مثال أذا حبيتي تشترين لصق وطلع عليك ب٣ دولار للحبه عندهم عرض تأخذين ٣ حبات لصق ب٥ دولار وبكذا عملتي توفير اذا تعدت سلتك ١٠٠ دولار راح يشحنون لك داخل أمريكا ببلاش ..

HOBBY LOBBY
برضو نفس كرييت فور لس متنوع وعندهم عروض جميلة وتخفيضات ..

Joann Fabric and Craft Stores
متنوع وشامل تقريبا ..

Save on crafts
متخصص وشامل لكل الاعمال الفنيه حتى ممكن تحصلون عنده شغلات متميزه عن غيره مثل التحف الفنيه الايطارات الصواني والجارز والمرايات والخشب اللي ممكن تعملين عليه شغلات فنيه بابداعك الخاص ..

ETSY
متنوع وشامل بس هذا زي موقع يتيح لك تفتحين فيه متجر خاص فيك يعني اي أحد يمارس هوايه معينه ممكن يبيع شغلاته الخاصه فيه وفيه بعض التاجرات يبيعون شغلات أو خطوط خاص فيهم أو أداوات معينه للكرافت .. أحسه غالي شوي في بعض الشغلات بس كم الاعمال والابداع فيه شيء ملهم ومسكت 

Ebay
نفس فكرة أمازون بس اللي يبيع فيه ممكن يكون أي شخص بالعالم عشان كذا لازم تكونون حذرين راح تلفت أنظاركم أسعاره الرخيصة جدا لدرجة الاندهاش ..! بس قبل تشترون من البائع أقرئي الرفيوز عنده وهل هو موثوق أو لا ..

=……………………………………………=

سكرابوكنق ،الاوراق ، الاستكرات :ًِثانيا


Scrapbook.com
أشهر وأضخم موقع سكرابوكنق على النت .. أعشق هالموقع بس أدخل أتصفح وأعرف وش أخر الاصدارات لكل شركة أو مصمم بعالم السكراب بوكنق فيه أغلب وأشهر الماركات العالمية المتخصصة بهالمجال فيه دروس وصور وفيديوهات ومصادر وكل شيء جميل ..

AmericanCrafts
أشهر ماركة بفن السكراب بوكنج غنية عن التعريف ..

Studio Calico
متخصص ايضا بفن السكراب بوكنج والستكرات والملصقات والبروجكت لايف


=……………………………………………=


ثالثا: مواقع أقمشة وخياطة :


جميل جدااا الاقمشة والالوان خيااال ومتنوعة الاقمشة حسب حاجتك سواء تفصيل أو ديكور أو كويلت ..لايفوتكم بصراحه كان لي تجربة مع موقع ماأذكره الان خاص بالاقمشة بأيام الاستعداد لتنسيق زواجي طلبت قماش خاص من أمريكا وفصلته للطاولات جدااا كان جميل وفخم ..


نفس اللي فوق بس حسيت أقمشته عاديه بالنسبه لي شوفوا قسم التصفيه عليه تخفيضات روعه..


=……………………………………………=


رابعا: الرسم :
Mister Art
متخصص للرسامين واللي يحبون يصبغون بالالوان والبخاخات عندهم أداوات فنية جميلة ودقيقة تعرفوا عليها وقارنوها بالمحلات المتواجده عندكم ..برضو فيه أقسام ثانيه للكرافت 


Art supplies online
برضو للرسامين والمصممين


Dickblick
رسم ،الوان ،اداوات رسم ،وتصميم الاعمال الفنية


=……………………………………………=


خامسا: خرز ومستلزمات صنع المجوهرات والاكسسوارات:


BEADAHOLIQUE
متخصص في بيع الخرز والحجارة والكرستالات والسلاسل وأي قطع تخص هالمجال لهم موزعين بأمازون ايضا.. وعندهم عروض روعة

Ornamentea
برضو لصنع الاكسسوارات وعندهم بعض مستلزمات الديكوباج والسكراب بوكنق والبلوق حقهم جدا جميل فيه بعض الدروس بهالاعمال ..

M&J Trimming
ياجماله يابنات يبكي بالذات اللي يحبون الشرايط والدانتيلات وهالخرابيط يعني ينفع لمحبات الخياطة والتفصيل والديكور بعد ..

بالاخير أتمنى تسامحوني لو أنصدمتوا بالاسعار في بعض المواقع
وهذا السبب اللي منعني من ذكرها لاني أخاف تتحطمون يعني ممكن سلة وحده تكلفك أقل شيء الف ريال سعودي غير الشحن لباب بيتك
بس هذا هو عالم الفن يكلفك شوي بس هذي الاشياء راح تستخدمينها لفترة طويله وغير كذا هو عالمك الخاص وقطع ثمينه لمجالك وفنك .. يعني مو خساره فيها ان شاء الله ..
آخر شي نصائح مهمة :
-لاتتسرعين بالشراء زي ماذكرت قبل ..
- اشتري بموسم تخفيضات أو عليها عروض.
- ضعي قائمة بأهم أحتياجاتك بحيث تكون مقسمة الى:
*أحتاجه جدا وضروي..
*أحتاجه لكن ليس الان ..
*ربما أحتاجه ونسبة إستخدامي ستكون حددي النسبة مثلا (١٠٪)
*لاأحتاجه ويمكن توفير بديل له

أتمنى أستفدتوا 

هناك تعليقان (2):

  1. في ايضا موقع ubay amazon وهو نسخة من امازون بس للشرق الاوسط

    ردحذف

 نورة النزاري
مُدوّنه سعودية مهتمة بالفنون والحرف اليدوية، والفنون الورقية و الرقمية
أعمل كمشرفة قيادة مدرسية في وحدة تطوير المدارس،
لدي طفله أسمها زمرد
Norah Alnezari
 Saudi DIY Blogger | Crafter | Scrapbooker | Graphic Designer
I have a baby girl, her name is Zomorod

Related Posts Plugin for WordPress, Blogger...